Në fillim të tetorit u zhvilluan ‘Ditët e Bukës Gjermane’, një aktivitet i rëndësishëm që u realizua falë partneritetit të ngushtë midis HWK Koblenz, Dhomës Kombëtare të Zejtarëve të Shqipërisë (DHKZ), Alta Academy, Shoqatës së Bukës, Pastiçerisë dhe Brumit të Shqipërisë, si dhe Odës së Prizrenit.
Ky bashkëpunim i qëndrueshëm ndërmjet shoqatave dhe dhomave profesionale krijoi një platformë të vlefshme për shkëmbimin e njohurive, zhvillimin e aftësive dhe promovimin e traditave të pjekjes gjermane.
‘Ditët e Bukës Gjermane’ jo vetëm që forcuan lidhjet profesionale mes tre vendeve, por gjithashtu kontribuan në krijimin e urave të reja të bashkëpunimit, duke theksuar rëndësinë e partneriteteve të forta në nxitjen e zhvillimit dhe mjeshtërisë artizanale.
Gjatë aktivitetit dyditor, Mjeshtërit bukëpjekës gjermanë zhvilluan seminare praktike për bukëpjekës dhe pastiçierë nga Shqipëria dhe Kosova. Ata ndanë njohuri mbi teknikat tradicionale gjermane të pjekjes, recetat dhe standardet e larta që karakterizojnë zanatin e bukëpjekësisë dhe pastiçerisë gjermane.
Pika kulmore ishte festivali rrugor më 3 tetor, që shënoi hapjen zyrtare të Javës së Kulturës Gjermane. Vizitorët u ftuan të shijonin bukët e sapopjekura gjermane të përgatitura nga mjeshtrit dhe të zbulonin larminë dhe traditat e kulturës gjermane të bukës.